you just do not know

no one just really know how much i feel now...ho much pain..how much loneliness...how much stressed...in different aspects of life. i just can't show..for people might think "what's new?" but without them knowing.. i really need a friend.

Alangan Cu Queca

Neng Josephine Luz de Leon
Pebreru 2, 2012

Queng tagle mung santing ampong ticdo
Pijung dacal a matang maglolo
Dumalan ca siguradung bumatyo
Maglusu la ding pusung gagayo


Matino ca at ating gelingan
Yng lagyu mu tutung quebaluan
Maracal la reng queca alangan
Mesabing metung a matenacan!

Pibatyon-batyon, silip-silipan
Potang biglang lunsu’t mipadalan
Lucsu yng pusu gang quen mung timan
Sumlag ing aldo cabang cabengian

Mara-marine, sala-salicut
Yng lacas ning lub, tutung yang dimut
Quiac-quiac ampong sinuc-sinuc
Pigil siuala, saradu asbuc

E ‘sing timyas ning dalagang Isiang
Culang leguan, malaut cang Sianang
Ecu artista, ecu paintunan
Queng lele dalan, labas-labasan

Malaut yng acu yang aburian
Marayu yng estadu’t cabilian
Yng queng bie mu, ala cung lugalan
Dapat yti cacu yang aintindian

Bista man queng bie mu tutung alangan
Yng pusu cu, ycang luluguran
Yng iraque yng laue mu’t timan
Quislap mata, tulang ‘lang cayarian!

Yng Cuentu Cu

Neng Josephine Luz de Leon

February 5, 2012

Cabang atyu queng dalan ba’t Menila muli na
Babalic-balican cu, aldong miyabe cata
Aldo pecamasaya, aldong pala mipnu la
Alub nang e mayari, e buring mauala pa.

Anyang linubut cata, inarap queng barcada
Pequilalang pamilya, at siniclod carela;
Anyang pequilala mu at sinabing acu na
E uari ana saya, E mipnu ing tula ta?

Pecapaquiramdaman nyang mipagcuentu cata

‘Gyang misan e aintindyan, pequiquibaluan cu la

Ban atin cung adaque, at asambitla queca

Ban mu namang abalu , tutung tutucyan da ca.

Balu cung acaquit mu, quislap dare ning mata

Yng aldo saslag sala potang acaquit daca

Teterac ne yng pusu, agyang titiman ca pa

Anti cung susulagpo, queng umang iba’t queca

O baquit ninanu na? O baquit ca meuala?

Nucarin ca migdatun, ba’t yng sala mepula?

Nanu rugung milyari, mipacanyan yng calma?

Sinta cu at caladua, nucarin catang adua?

Licquan mu cung magdili, cabud mu bigla-bigla!

Emu pequiramdaman, e mecapagsalita

E mucu man binatyo, e caman miganaca

Abe co balu mu sa, menacasaquit cu’t meina!

Sibucan cu ing tagal, paquit quegana-gana

Ban mumung apaltutuan, lugud pariquil queca

 ‘Gyang nucarin ca munta, ala iting calupa

Tune’t mapibabata, lugud a ‘lang capara!

Milabas yng panaun, deng aldo atna caba

Balang galo ning relo, pibabatan cung bina

‘Ti cu waring candila, miyanginan at mitda

Emu cabud abilang,  pijung dinagus yng lua.

Mibalic queng isip cu, deng galo ban misalba

Migcasaquit quinimut, nung sang iquit mu yta

Malaus mangaplus ca, at mecad mibalic ca

Quiac yng cacung siuala, tutung magmalun queca .

Oneng emu cu iquit, maracal a dalaga

Yla ring queca bage, mangalagu’t macualta

Enaca manaquit pa, agyang pang numanu ca

Sing timyas ning pusu cu, yng lugud para queca!