Patune ning Cacung Lugud
June 5, 2011
By Josephine Luz de Leon
Yng lugud nung tutu meng sucdan
Miras ca queng alang cayaryan
Uling capilan man ali me aquit
Dapot damdaman me ing queyang riquit.
Queng pamicalugud, dapat mung tandanan
Dacal pagsubuc yng quecang dalanan
Misan anggang pacatalan me yng tali
Queng saquit, Queca meng atatabili.
Queng lugud, dapot tuneng masaquit
Yng calayan emu lubus pagcait
Uling misan ali yng pamanalan yng sucatan
Nune yng pamagsacrispisyu queng sariling casayan.
Nung tune yng quecang daraun a lugud
Ibie mu anggang pangisnawa mu mapaclud
Uling misan cailangan mung mate
Para yng caluguran mu yang cumabie.
Eca migaganaca nung acu angga ngeni matamle
Ecu buring sabyan na e taus yng cacung dinaque
Ala ca queng siping cu caya cu mu matamle
Emu alaco ita uling caluguran daca pa ring tune.
Ngeni iquit mu na yng amanwan cung lugud?
Yng binye cung pusu queca mu cabud
Nya anggang camate cu, pebren dacang bucud
Ecu agyung mitangis ca ampong misusubsub.
Bista man cacung quemate, yng quecatang pamiwale
Pasibayu cung cumabye,potang acaquit dacang masalese
Pangadi cu yng sucdul cang magtagumpe
Canita apatunayan cung matulid at istu yng cacung binye.
